Presidenti i Republikës së Shqipërisë, Bajram Begaj, i ka kërkuar homologes së tij moldave, Maia Sandu, që Moldavia të rishqyrtojë qëndrimin e saj për njohjen e shtetit të Kosovës. Kërkesa u bë gjatë vizitës zyrtare që kreu i shtetit shqiptar po zhvillon në Moldavi.

“Së bashku, si partnerë dhe si miq, punojmë për një Evropë më të fortë dhe më të sigurt, si dhe inkurajojmë rishqyrtimin e njohjes së Kosovës”, shkroi Begaj pas takimit me presidenten Sandu.

Sipas Presidentit shqiptar, bisedimet me homologen moldave kanë qenë frytdhënëse dhe janë fokusuar te forcimi i marrëdhënieve dypalëshe, dialogu politik i qëndrueshëm dhe bashkëpunimi konstruktiv në funksion të interesave të përbashkëta dhe të qytetarëve të dy vendeve.

Begaj theksoi gjithashtu rëndësinë e zgjerimit të Bashkimit Evropian në kontekstin aktual të sigurisë, duke e cilësuar atë si një faktor kyç për stabilitetin dhe paqen në kontinent.
“Në mjedisin sfidues të sigurisë së sotme, zgjerimi i Bashkimit Evropian mbetet faktor kyç për stabilitetin dhe paqen. Ne mbështesim plotësisht rrugën evropiane të Moldavisë”, u shpreh Presidenti i Shqipërisë.

Vizita zyrtare e Begajt në Moldavi vjen në kuadër të përpjekjeve për thellimin e bashkëpunimit politik dhe diplomatik mes dy vendeve, si dhe për koordinimin në proceset integruese evropiane.