Rasti i influencieres shqiptare Dajana Kalo, vetëm 25 vjeçe, ka rikthyer në vëmendje problematikat e shërbimit shëndetësor publik dhe akuzat për mungesë reagimi në situata jetike në QSUT.

E reja ndodhet në gjendje serioze shëndetësore pasi ka pësuar hemorragji cerebrale si pasojë e një Malformacioni Arteriovenoz (MAV). Sipas familjarëve, ajo është e shtruar prej 29 dhjetorit në pavionin e neurokirurgjisë në QSUT dhe aktualisht është e paralizuar në anën e djathtë, pas një goditjeje në tru.

Familjarët kanë denoncuar publikisht në rrjete sociale se, pavarësisht urgjencës mjekësore, për javë të tëra janë përballur me zvarritje, mungesë përgjegjësie dhe justifikime nga institucioni shëndetësor, pa u kryer ndërhyrja e nevojshme në kohë.

Sipas tyre, për të vendosur mbi kirurgjinë – përfshirë edhe mundësinë e trombektomisë – është e domosdoshme kryerja e ekzaminimit Arteriografi (DSA). Edhe pse në QSUT ndodhen dy pajisje për këtë ekzaminim, familjarët pretendojnë se njëra nuk funksionon, ndërsa për tjetrën kërkohet miratimi i një mjeku që nuk e merr përsipër procedurën.

Po sipas denoncimeve, mjeku në fjalë ushtron aktivitet edhe në një spital privat, i cili është aktualisht i vetmi jashtë sistemit publik që ofron këtë shërbim, me kosto që, sipas familjarëve, nisin nga 25 mijë euro. Këto rrethana kanë ngritur dyshime publike për konflikt interesi, klientelizëm dhe monopol mes shëndetësisë publike dhe asaj private, akuza që deri tani mbeten pretendime të familjarëve dhe nuk janë konfirmuar zyrtarisht nga institucionet.

Përballë pamundësisë financiare, familjarët e Dajanës kanë hapur një fushatë GOFUNDME, duke kërkuar ndihmë për të siguruar trajtimin e nevojshëm.

Në reagimet publike, ata kërkojnë përgjegjësi institucionale dhe i drejtojnë akuzat ndaj Kryeministrit Edi Rama, Ministres së Shëndetësisë, si dhe drejtuesve të QSUT-së, duke i konsideruar përgjegjës për funksionimin e një sistemi që, sipas tyre, po lë një të re “të presë mes jetës dhe vdekjes”.

Deri në këto momente, nga QSUT apo Ministria e Shëndetësisë nuk ka një reagim zyrtar publik lidhur konkretisht me këtë rast.