Jani Aliaj, një nga emrat më të njohur të botës së krimit shqiptar, është vrarë ditën e sotme në burgun e sigurisë së lartë Korydallos në Greqi.

Aliaj ishte i dënuar me burgim të përjetshëm nga drejtësia shqiptare për vrasjen e Elton Çiços, ngjarje e ndodhur më 1 maj 2016 në zonën e ish-Bllokut në Tiranë, e lidhur me motive hakmarrjeje. Ai rezultonte gjithashtu i përfshirë në disa ngjarje të rënda kriminale edhe jashtë Shqipërisë.

Shtetasi shqiptar u arrestua mëngjesin e 31 dhjetorit 2024 në Athinë nga efektivët e skuadrës “DIAS”, teksa lëvizte në rrugë dhe u ndalua për kontroll si person i dyshimtë. Gjatë verifikimit, ai u kap me kartë identiteti false greke, çka çoi në shoqërimin e tij në komisariatin e Moskatos.

Hetimet zbuluan se Aliaj kishte arratisur nga burgu i Korfuzit, ku vuante dënimin me burgim të përjetshëm, plus 2 vjet e 12 muaj, për një tjetër vrasje të ndodhur në Athinë në vitin 2006, si dhe për plagosje të rëndë dhe armëmbajtje pa leje.

Po ashtu, ai ishte i kërkuar ndërkombëtarisht për dy vrasje të tjera në Shqipëri, të ndodhura në tetor 2015 dhe maj 2016, duke e bërë një nga personazhet më të kërkuar të botës së krimit në rajon.

Vrasja e tij brenda ambienteve të burgut grek shënon fundin e një historie të gjatë kriminale, të shtrirë në disa shtete dhe të ndjekur prej vitesh nga autoritetet shqiptare dhe greke. Rrethanat e sakta të ngjarjes dhe autorët janë ende nën hetim nga autoritetet greke.