Një moment i pazakontë ka tërhequr vëmendjen e mediave dhe rrjeteve sociale këtë të hënë në ambientet e SPAK, ku avokati i Safet Bajrit u shfaq duke përdorur një karrocë marketi për të transportuar fashikujt hetimorë në kuti.

Safet Bajri, i njohur si “i forti” i Shkodrës, ndodhet në burg prej disa muajsh, i akuzuar për vrasjen e Fatbardh Licit. Arrestimi i tij erdhi tri ditë pas një operacioni të RENEA-s në Dobraç, zonë e njohur si bastioni i fisit Bajri, ku u kontrolluan disa banesa, përfshirë edhe atë të Bajrit.

Ndërsa në Shqipëri ai hetohet për trafik droge, vrasje, gjobëvënie dhe shantazh, në Bruksel është dënuar me 9 vite burgim për trafik droge dhe prostitucion.

Historiku kriminal i Safet Bajrit përfshin ngjarje të dhunshme, mes tyre masakrën e Dobraçit më 30 tetor 2024, ku u vranë Hamza Lici dhe Arlind Bushati, si dhe dy kalimtarë të pafajshëm, Bashkim dhe Flutura Basha. Ai dyshohet gjithashtu për përplasjen me armë në Bushat më 23 gusht 2024 dhe bashkëpunimin në vrasjen e Fatbardh Licit në vitin 2018.

Konflikti mes fisit Bajri dhe Lici ka qenë i gjatë dhe i përgjakshëm, duke bërë që emri i Safet Bajrit të lidhet me një seri ngjarjesh kriminale të ndodhura në Shkodër dhe më gjerë.

Ky rast i avokatit që përdor një karrocë për të transportuar dosjet hetimore ka shkaktuar reagime të ndryshme, duke u bërë viral në rrjetet sociale, ndërsa çështja penale e Safet Bajrit vijon në SPAK dhe gjykatat shqiptare.