Presidenti i Serbisë, Aleksandër Vuçiç, po vazhdon të nxjerrë në pah tensione me Bashkimin Evropian, duke zgjedhur vetëm bashkëbiseduesit që i përshtaten dhe duke e konsideruar kritikët si armiq. Kështu e ka vlerësuar raportuesi i Parlamentit Evropian për Serbinë, Tonino Picula, në një intervistë për gazetën serbe “Vecernji list”.

Picula theksoi se qasja e Vuçiç nuk është e re, pasi ai e trajton në të njëjtën mënyrë edhe rivalët politikë vendas dhe qytetarët e Serbisë. “Vuçiç flet kryesisht ose me një pasqyrë, ose me gazetarë të zgjedhur, të cilët më pas përcjellin perceptimin e tij për situatën në Serbi dhe rajon”, tha Picula.

Raportuesi i PE përmendi gjithashtu se deklaratat e sulmeve ndaj Bashkimit Evropian dhe kritikëve të tij janë shtuar kohët e fundit, pak ditë para vizitës së delegacionit të Parlamentit Evropian në Beograd, të udhëhequr nga vetë Picula, që u zhvillua nga 22 deri më 24 janar. Vuçiç dhe kryetarja e Asamblesë Kombëtare, Ana Brnabiç, refuzuan të takonin delegacionin.

Sipas Piculës, pyetja kryesore që lind është nëse Serbia, me Vuçiçin në krye, dëshiron realisht të anëtarësohet në Bashkimin Evropian: “Deklarativisht po, por në praktikë po bën gjithçka për ta shmangur atë”. Ai shtoi se problemet në Serbi janë akumuluar gjatë viteve dhe se Vuçiç fajëson të tjerët për sfidat e vendit, duke shmangur përgjegjësinë e vet dhe të sistemit të tij.

Raportuesi përsëriti gjithashtu mbështetjen e Parlamentit Evropian për politikën e zgjerimit, duke përfshirë Serbinë, por nënvizoi se përparimi i vendit mbetet i ngadalshëm për shkak të problemeve të pazgjidhura politike dhe institucionale.