Autoritetet e zbatimit të ligjit në Kosovë po zhvillojnë një operacion në rajonin e Prizrenit, në lidhje me dyshimet për keqpërdorim të votave në zgjedhjet e parakohshme të 28 dhjetorit. Lajmi është konfirmuar për Radion Evropa e Lirë nga zëdhënësja e Policisë së Kosovës, Luljeta Mehmeti.

“Policia e Kosovës, në bashkëpunim me Prokurorinë Themelore në Prizren, sot është duke zhvilluar një operacion në rajonin e Prizrenit lidhur me dyshimet për keqpërdorim të votave”, deklaroi Mehmeti, pa dhënë detaje të mëtejshme, duke theksuar se informacionet shtesë do të bëhen publike pas përfundimit të aksionit.

Sipas raportimeve të “Betimi për Drejtësi”, medium i specializuar në çështjet e drejtësisë, mbi 100 zyrtarë janë thirrur për t’u marrë në pyetje dhe priten arrestime. Aksioni lidhet me dyshime për manipulime të gjera të votave, veçanërisht brenda subjekteve politike.

Dyshimet kanë çuar Komisionin Qendror të Zgjedhjeve në rinumërim të plotë të votave, proces që po vijon prej disa ditësh. Fillimisht, KQZ konstatoi mospërputhje në votat për kandidatët për deputetë, ndërsa rinumërimi i pjesshëm nxori në pah diferenca të konsiderueshme. Si pasojë, prokuroria nisi mbledhjen e provave, ndërsa KQZ shkarkoi përfaqësuesit politikë në komisionin komunal të Prizrenit.

Manipulimi i votave përbën vepër penale në Kosovë dhe dënohet me burgim. Megjithatë, sipas një hulumtimi të organizatës ÇOHU, mbi 90 për qind e rasteve të manipulimeve zgjedhore përfundojnë me dënime me kusht ose gjoba.

Ndërkohë, shumica e kandidatëve të cilëve u janë hequr më së shumti vota gjatë rinumërimit kanë mohuar përfshirjen dhe janë distancuar publikisht nga çdo formë keqpërdorimi.

Zgjedhjet e 28 dhjetorit u fituan nga Lëvizja Vetëvendosje e kryeministrit në detyrë Albin Kurti, me mbi 51 për qind të votave, çka i siguron 57 ulëse në Kuvendin e ardhshëm. Edhe pse rinumërimi nuk pritet të ndikojë në rezultatin përfundimtar të partive, ai mund të zvarrisë procesin e certifikimit dhe formimit të qeverisë së re.