Një natë argëtimi me videolojëra në një banesë në Oklahoma përfundoi tragjikisht, pasi një 19-vjeçar dyshohet se vrau vëllanë e tij më të madh pas një konflikti gjatë lojës.

Sipas mediave lokale, William Spencer, 19 vjeç, dhe vëllai i tij 25-vjeçar, Nicholas Spencer, po luanin së bashku mbrëmjen e së dielës, kur një mosmarrëveshje përshkallëzoi në dhunë. William dyshohet se e goditi Nicholas me thikë, duke i shkaktuar plagë fatale.

Pas ngjarjes, 19-vjeçari telefonoi vetë autoritetet, duke pranuar se kishte therur vëllanë e tij. Policia e Oklahomës bëri të ditur se, kur mbërritën në vendngjarje, gjetën viktimën me plagë të rënda thike. Nicholas Spencer u transportua me urgjencë në spital, por nuk arriti t’u mbijetojë plagëve dhe u shpall i vdekur.

Rreshteri Gary Knight e përshkroi ngjarjen si “jashtëzakonisht tragjike”, duke theksuar se konflikti kishte nisur gjatë një loje. “Dy vëllezër po luanin videolojëra. Njëri u zemërua dhe sulmoi tjetrin, duke i marrë jetën,” tha ai.

William Spencer u arrestua në vendin e ngjarjes dhe u dërgua në Qendrën e Paraburgimit të Qarkut të Oklahomës. Ai ka pranuar përfshirjen në krim dhe po përballet me akuza për vrasje të shkallës së parë. 19-vjeçari mbahet në paraburgim me një garanci prej 10 milionë dollarësh, ndërsa hetimet për rrethanat e plota të ngjarjes vazhdojnë.