Presidenti amerikan, Donald Trump, ka kritikuar ashpër qeverinë kanadeze, duke e akuzuar për refuzim të bashkëpunimit ushtarak me SHBA dhe për afrim me Pekinin.

Në një postim të publikuar të premten, Trump u shpreh se Otava ka zgjedhur të bashkëpunojë me Kinën, në vend që të pranojë integrimin në sistemin anti-ajror amerikan “Kupola e Artë”, projekt i cili, sipas tij, do të ofronte mbrojtje jo vetëm për Groenlandën, por edhe për Kanadanë.

Presidenti paralajmëroi se refuzimi i Kanadasë dhe orientimi drejt Kinës mund të ketë pasoja serioze për sigurinë rajonale dhe bashkëpunimin strategjik ndërmjet vendeve aleate.

“Kanadaja është kundër ndërtimit të ‘Kupolës së Artë’ mbi Groenlandën, edhe pse Kupola do ta mbrojë Kanadanë. Në vend të kësaj, ata votuan për të bashkëpunuar me Kinën, e cila do t’i ‘përpijë’ ata brenda vitit të parë!”, shkruan Trump.

Reagimi i presidentit amerikan vjen në një kohë tensionesh të shtuara gjeopolitike në rajonin e Arktikut. Kohët e fundit, Trump ka deklaruar se Kina dhe Rusia kanë ambicie strategjike për Groenlandën, territor që ai e konsideron me rëndësi të veçantë për sigurinë kombëtare të SHBA-ve.

Deklaratat e tij kanë ngjallur reagime dhe polemika, veçanërisht për mënyrën e drejtpërdrejtë dhe akuzuese ndaj një aleati tradicional si Kanadaja, si dhe për paralajmërimet e forta lidhur me ndikimin në rritje të Kinës në hemisferën perëndimore.