E ftuar në emisionin “Live From Tirana” me Ronaldo Sharkën, Olta Sheta ka komentuar zhvillimet më të fundit në shtëpinë e “Big Brother VIP 5”, duke u ndalur veçanërisht te banorët dhe raportet mes tyre.

E pyetur për zërat që flasin për një afrim mes Kristit dhe Krusitës, Olta u shpreh se nuk ka vënë re shenja romance mes tyre, duke e parë më shumë situatën si pjesë të lojës.

“Këtë nuk e di, nuk e kam parë. Por unë e shoh Kristinin si lojtar. Nëse ka një njeri që e ka kuptuar si luhet Big Brother, është ‘bajamja’,” u shpreh ajo, duke shtuar me nota humori se të dy janë këngëtarë dhe mund të përfundojnë edhe në ndonjë duet muzikor.

Megjithatë, Olta përjashtoi mundësinë e një lidhjeje sentimentale mes tyre. “Si çift, jo. Nuk besoj që Krusita do ketë preferenca siç është Kristi,” tha ajo.

Duke folur më gjerësisht për Kristinin, Sheta e vlerësoi atë si një nga figurat më të forta të lojës. Sipas saj, ai është një person pozitiv, inteligjent dhe me intuitë të fortë, që di të krijojë situata dhe të trazojë ujërat brenda shtëpisë.

“Më pëlqen mënyra se si luan, i acaron të gjithë. Ka shumë intuitë, është i zgjuar. Sidomos ajo dalja nga burgu ishte fantastike, më ka pëlqyer shumë. Ai është motori i shtëpisë,” përfundoi Olta Sheta.

Komentet e saj kanë nxitur diskutime mes ndjekësve të formatit, ndërsa gara në “Big Brother VIP 5” vijon të bëhet gjithnjë e më e fortë.