Pushtimi i Ukrainës nga Rusia ka sjellë pasoja shkatërruese në aspektin njerëzor, me gati dy milionë viktima ushtarake të regjistruara deri më tani, sipas një studimi të publikuar nga Qendra për Studime Strategjike dhe Ndërkombëtare (CSIS), një organizatë amerikane me bazë në Uashington.

Raporti vlerëson se forcat ruse kanë pësuar humbjet më të rënda, me rreth 1.2 milionë viktima që nga nisja e luftës në shkurt 2022, përfshirë deri në 325 mijë ushtarë të vrarë. Nga ana tjetër, Ukraina ka regjistruar mes 500 mijë dhe 600 mijë viktima, ku 100 mijë deri në 140 mijë prej tyre rezultojnë të vrarë, gjatë periudhës shkurt 2022 – dhjetor 2025.

Sipas ekspertëve të CSIS, bilanci i përgjithshëm i viktimave ushtarake nga të dyja palët pritet të arrijë në 1.8 milionë dhe mund të shkojë deri në 2 milionë deri në pranverën e vitit 2026, nëse luftimet vijojnë me të njëjtin intensitet.

Ndërkohë, Organizata e Kombeve të Bashkuara raporton se të paktën 15 mijë civilë janë vrarë që nga fillimi i konfliktit, megjithatë monitoruesit ndërkombëtarë paralajmërojnë se shifra reale ka gjasa të jetë ndjeshëm më e lartë, për shkak të vështirësive në verifikimin e plotë të të dhënave në zonat e luftës.

Presidenti ukrainas Volodymyr Zelensky deklaroi në shkurt 2025 për NBC se Ukraina ka humbur rreth 46 mijë ushtarë, ndërsa dhjetëra mijëra të tjerë rezultojnë të zhdukur ose të kapur rob. Analistët, megjithatë, vlerësojnë se këto shifra janë të nënvlerësuara. Nga ana e Rusisë, humbjet mbeten sekret shtetëror. Të dhënat e fundit zyrtare të Moskës, të publikuara në shtator 2022, flasin për 5,937 të vrarë, sipas AFP. Por investigimet e BBC Russian dhe Mediazona kanë identifikuar mbi 163 mijë ushtarë rusë të vrarë, duke theksuar se numri real është dukshëm më i lartë.

Studimi thekson se lufta në Ukrainë është kthyer në konfliktin më të përgjakshëm në Evropë që nga Lufta e Dytë Botërore, me pasoja afatgjata jo vetëm për dy vendet, por edhe për sigurinë ndërkombëtare.