Policia ka finalizuar fazën e 14-të të operacionit policor të koduar “Storm”, në kuadër të goditjes së veprimtarive të paligjshme të prostitucionit. Aksioni u zhvillua nga Seksioni për Hetimin e Trafiqeve, me mbështetjen e Forcës së Posaçme Operacionale, pas një hetimi dyjavor të ndjekur me metoda speciale.
Si rezultat i operacionit, u proceduan në gjendje të lirë dy shtetase të huaja, Th. C., 35 vjeçe dhe A. F., 39 vjeçe, të lindura në Brazil, për veprat penale “Prostitucion” dhe “Përshtatja e ambienteve për prostitucion”. Gjithashtu, për veprën penale “Prostitucioni”, u proceduan në gjendje të lirë edhe dy shtetas shqiptarë, E. D. dhe S. A., banues në Durrës.
Gjatë kontrollit, policia sekuestroi në cilësinë e provës materiale shuma të konsiderueshme parash në valuta të ndryshme, konkretisht 1 080 euro, 116 700 lekë, 120 dollarë amerikanë, 80 paund britanikë, 150 franga dhe 3 430 dinarë. Po ashtu, u sekuestruan dy pasaporta të shtetaseve të huaja, tetë aparate celularë, karta telefoni dhe blloqe shënimesh.
Nga hetimet rezultoi se dy shtetaset kishin marrë me qira një apartament në zonën e Vollgës, në lagjen nr. 1 të Durrësit, të cilin e kishin përshtatur për ushtrimin e aktivitetit të prostitucionit.
Materialet proceduriale janë referuar Prokurorisë pranë Gjykatës së Shkallës së Parë të Juridiksionit të Përgjithshëm Durrës, për veprime të mëtejshme ligjore.
