Zv. presidentja e Partisë së Lirisë, Erisa Xhixho, ka reaguar ashpër ndaj miratimit të ndryshimeve në Kodin Penal, duke e cilësuar procesin si të nxituar dhe të munguar në transparencë.

Sipas Xhixhos, paketat e reja ligjore godasin qytetarët e thjeshtë për shkelje administrative, ndërkohë që zyrtarët e përfshirë në afera korruptive mbeten të paprekur nga drejtësia. Ajo thekson se ky standard i dyfishtë dëmton rëndë besimin e publikut te institucionet dhe forcon ndjesinë e pandëshkueshmërisë.

Zv. presidentja e PL-së paralajmëroi se ndryshimet e miratuara nuk e afrojnë Shqipërinë me standardet europiane, por përkundrazi rrezikojnë të legjitimojnë padrejtësinë dhe mbrojtjen e korrupsionit shtetëror.

Sipas saj, reformat ligjore duhet të synojnë barazinë para ligjit dhe forcimin e drejtësisë, jo penalizimin e qytetarëve dhe mbrojtjen e pushtetit.