Seanca e zhvilluar sot në Gjykatën e Posaçme Kundër Korrupsionit dhe Krimit të Organizuar për ish-presidentin Ilir Meta është shoqëruar me tensione dhe debate mes palëve.

Avokati i Metës, Kujtim Carkani, në një komunikim për mediat, dha detaje nga ajo që ndodhi në sallën e gjyqit, duke theksuar se pati përplasje mes klientit të tij dhe prokurorit Kllapi.

Sipas Carkanit, në seancë ishte i pranishëm vetëm prokurori Kllapi, ndërsa Altin Dumani dhe Arben Kraja nuk morën pjesë. Ai pretendon se gjatë relatimit, prokurori ka paraqitur pasaktësi në data dhe momente kohore, çka sipas mbrojtjes ka shkaktuar reagime dhe ndërhyrje të shpeshta nga ana e avokatëve.

“Jemi në seancë paraprake, ku duhet të shqyrtohen veprimet proceduriale. Kur prokuroria mashtrojnë, si në rastin e lobimit ku Meta nuk ka firmosur asnjë dokument, është normale të reagojmë”, u shpreh Carkani.

Avokati kritikoi gjithashtu faktin që, sipas tij, prokuroria ka relatuar fakte të interpretuara dhe jo prova konkrete, duke shtuar se mungesa e listës së provave përbën një problem serioz në proces.

“Prokurori tha se do të relatonte fakte, por pranoi se këto nuk janë prova. Ne kërkojmë akuza konkrete për zotin Meta, për zonjën Kryemadhi dhe të tjerët. Nuk mund të vijë prokuroria pa listën e provave”, deklaroi ai.

Sipas mbrojtjes, çdo paqartësi apo pasaktësi në paraqitjen e çështjes ka sjellë tension dhe kundërshtime të vazhdueshme gjatë seancës.