Raportuesi i Përhershëm i Parlamentit Evropian për Shqipërinë, Andreas Schieder (S&D, Austri), ka refuzuar të komentojë denoncimet e kryetarit të Partisë Demokratike, Sali Berisha, lidhur me skandalin e AKSHI-it dhe pretendimet për eksportim të të dhënave sensitive të NATO-s drejt vendeve armike të Aleancës.

I pyetur sot nëse këto akuza janë parë si shqetësim nga Bashkimi Evropian, Schieder u distancua nga deklaratat e opozitës shqiptare, duke theksuar se nuk mund të reagojë ndaj çdo pretendimi politik.

“Nuk mund të më bëni pyetje për gjithçka që thotë Berisha dhe gjithçka që bën ai, sepse do të më duhej të dilja nga roli im institucional,” u shpreh raportuesi i PE-së.

Deklarata e Schieder vjen pas akuzave publike të Berishës, i cili ka pretenduar se, sipas një dosjeje të SPAK, të dhëna sekrete të disponuara nga Shqipëria dhe të lidhura me NATO-n janë shpërndarë te vende armike. Megjithatë, nga ana e institucioneve evropiane nuk ka deri më tani asnjë reagim apo konfirmim zyrtar mbi këto pretendime.