Një aksident i rëndë rrugor është regjistruar në Savigliano të Italisë, ku kanë humbur jetën dy shtetas shqiptarë, të dy rreth moshës 20 vjeç.

Sipas mediave italiane, makina me të cilën udhëtonin të rinjtë është përplasur fuqishëm me një kamion. Në automjet ndodhej edhe një person i tretë, i cili ka mbetur i plagosur rëndë dhe është transportuar me urgjencë në spital.

Nga aksidenti janë plagosur gjithashtu drejtuesi i kamionit dhe pasagjerja që ndodhej me të, të cilët po marrin ndihmë mjekësore jashtë rrezikut për jetën.

Si pasojë e përplasjes, qarkullimi i automjeteve në zonë u bllokua përkohësisht, duke shkaktuar trafik dhe ndërhyrjen e menjëhershme të shërbimeve të emergjencës.

Autoritetet italiane kanë nisur hetimet për të zbardhur shkaqet e aksidentit tragjik, ndërsa identiteti i plotë i viktimave pritet të konfirmohet zyrtarisht.