Qarkullimi në aksin kombëtar Librazhd–Prrenjas është ndërprerë plotësisht që prej orës 11:00 të paradites, pas rrëshqitjeve masive të gurëve që kanë pushtuar segmentin e njohur si “Kthesat e Dragostunjës”. Dhjetëra e qindra metra kub gurësh kanë rënë mbi trasenë e rrugës, duke e bërë të pamundur kalimin e automjeteve dhe duke krijuar situatë alarmante për drejtuesit e mjeteve.

Qindra qytetarë kanë mbetur të bllokuar për orë të tëra në të dy drejtimet e rrugës, e cila përfaqëson një nga arteriet më të rëndësishme kombëtare që lidh Librazhdin me Juglindjen e Shqipërisë.

Në terren ndodhen forca të shtuara të Policisë Rrugore, të cilat monitorojnë situatën dhe përpiqen të menaxhojnë trafikun. Megjithatë, ndërhyrjet janë të kufizuara për shkak të mungesës së mjeteve dhe ekipimeve nga kompanitë përgjegjëse për mirëmbajtjen e segmentit, si dhe nevojës për ndërhyrje teknike për largimin e masave të mëdha shkëmbore.