TIRANË – Aksioni i prokurorisë për trafikun e paligjshëm të mbetjeve të rrezikshme ka nxjerrë në pah mungesën totale të përgjegjësisë politike për një nga krimet më të rënda mjedisore të regjistruara në Shqipëri. Kështu deklaroi anëtari i Kryesisë së Partisë Demokratike, Grigels Muçollari, gjatë një konference për shtyp, duke akuzuar drejtpërdrejt qeverinë dhe institucionet shtetërore për mbulim të aferës.

Sipas Muçollarit, ministrja e Mjedisit dhe ish-drejtori i Portit të Durrësit nuk kanë mbajtur asnjë përgjegjësi, pavarësisht se, sipas opozitës, janë të lidhur drejtpërdrejt me trafikun e paligjshëm të 2 800 tonëve mbetje të rrezikshme, të transportuara në 108 kontejnerë drejt Tajlandës.

“Prokuroria e Durrësit amnistoi Mirela Kumbaron dhe Pirro Vengun për krimin më të madh mjedisor të regjistruar në vend”, deklaroi Muçollari, duke shtuar se hetimi, që zgjati më shumë se një vit, përfundoi me fajësimin e disa specialistëve dhe drejtuesve të nivelit të mesëm, ndërsa përgjegjësit politikë mbetën të paprekur.

Ai akuzoi se, nën përgjegjësinë e ministrisë së Mjedisit, mbetjet u ngarkuan në Elbasan, u transportuan në Durrës dhe u nisën jashtë vendit pa asnjë pengesë, ndërsa në Portin e Durrësit, sipas tij, kontrollet dhe masat e sigurisë rezultuan vetëm “propagandë boshe”. Muçollari theksoi se ngarkesa e sekuestruar nuk ishte e vetmja dhe se rreth 50 mijë tonë mbetje të tjera do të kishin ndjekur të njëjtin itinerar, nëse nuk do të kishte ndërhyrë Rrjeti i Bazelit dhe autoritetet e vendeve të tjera.

Në deklaratën e tij, përfaqësuesi i PD-së ngriti edhe akuza për promovim të zyrtarëve të lidhur me këtë çështje, duke e cilësuar këtë si një mesazh të qartë të pandëshkueshmërisë. “Ky është një krim i dytë, edhe më i rëndë se ai mjedisor: krimi i pandëshkueshmërisë”, u shpreh ai.

Muçollari e mbylli deklaratën me thirrje për reagim qytetar, duke theksuar se, sipas tij, mungesa e përgjegjësisë morale dhe politike e bën reagimin publik një detyrim, jo një zgjedhje.