Shqipëria vijon të përballet me një tkurrje të fortë demografike, veçanërisht në grup-moshën më aktive për punë. Sipas të dhënave më të fundit të Eurostat, vetëm gjatë vitit që lamë pas, vendi ka humbur mbi 18 mijë të rinj të moshës 15–29 vjeç, kryesisht për shkak të emigrimit, ndërsa paralelisht po rritet pesha e popullsisë në moshë pensioni.

Në janar 2025, Shqipëria numëronte rreth 405,800 të rinj në këtë grup-moshë, 18,300 më pak krahasuar me një vit më parë. Kjo përkthehet në një rënie vjetore prej 4.3%, duke e renditur Shqipërinë në krye të vendeve europiane për humbjen e rinisë. Ritmi i tkurrjes është katër herë më i lartë se ai i Serbisë, e cila ka shënuar një rënie prej 1%.

Ndryshe nga Shqipëria, shumica e vendeve të Bashkimit Europian po stabilizojnë ose po rrisin numrin e të rinjve. Sllovakia, Austria dhe Turqia raportojnë ulje minimale, nën 1%, ndërsa Spanja ka shënuar rritje me 2.8%, dhe Bullgaria e Rumania me rreth 2% në grup-moshën 15–29 vjeç. Këto shtete po arrijnë të mbajnë ose të tërheqin të rinjtë përmes tregut të punës dhe politikave arsimore.

Sipas ekspertëve, të dhënat tregojnë se tkurrja e rinisë nuk është një fenomen i përgjithshëm ballkanik, por një problem specifik shqiptar. Humbja e mbi 18 mijë të rinjve brenda një viti barazohet me “zhdukjen” demografike të një qyteti të tërë studentësh dhe profesionistësh të rinj, duke krijuar pasoja afatgjata për tregun e punës, sistemin e pensioneve dhe zhvillimin ekonomik.

Ndërkohë, Gjermania dhe Italia, dy destinacionet kryesore të emigracionit shqiptar, kanë shënuar rritje të popullsisë së re, përkatësisht me 0.5% dhe 0.7%, duke përfituar drejtpërdrejt nga kapitali njerëzor që largohet nga Shqipëria. Ekspertët theksojnë se nevoja për politika konkrete që ndalojnë emigrimin dhe inkurajojnë qëndrimin e rinisë në vend është më urgjente se kurrë.