Një 42-vjeçar shqiptar u arrestua nga karabinierët italianë në Rimini, pasi ishte rikthyer ilegalisht në vend, pavarësisht një urdhri dëbimi me ndalim rikthimi.

Burri u pikas gjatë kontrollit të një automjeti me targa të huaja, ku ndodhej edhe një person tjetër. Karabinierët vunë re sjellje të dyshimtë gjatë identifikimit dhe kryen kontrolle të mëtejshme, duke konstatuar se shqiptari nuk kishte leje qëndrimi në Itali.

Hetimet zbuluan se ai ishte dëbuar nga Drejtoria e Policisë së Barit në vitin 2023. Për të shmangur ndalimin, ai ishte martuar në Shqipëri, kishte marrë mbiemrin e bashkëshortes dhe kishte siguruar dokumente identiteti të reja, duke tentuar të kalonte pa u identifikuar.

42-vjeçari u arrestua për shkelje të ligjeve mbi emigracionin dhe u mbajt në komisariat, në pritje të gjykimit të drejtpërdrejtë, i cili ishte parashikuar për mëngjesin e së mërkurës.