Gazetarja Denada Jushi deklaroi në një intervistë se ekzistojnë të dhëna konkrete që ish-kreu i SPAK, Altin Dumani, mund të jetë i rrezikuar për shkak të detyrës që ka ushtruar për katër vite me radhë.

Sipas Jushit, bazuar në këto indicie, drejtuesi i ri i SPAK ka paraqitur një kërkesë zyrtare për shtim të masave mbrojtëse nga Garda e Republikës, por deri më tani nuk është ndërmarrë asnjë veprim konkret.

“Në investigimet që kam bërë, them me përgjegjësi se ish-drejtuesi i SPAK, pas përfundimit të mandatit, lëviz i shoqëruar vetëm nga dy efektivë të Gardës, ndërsa familja e tij ruhet nga Policia e Shtetit”, u shpreh Jushi.

Ajo theksoi se çështja është trajtuar edhe në Komisionin e Mbrojtjes pranë Këshillit të Lartë të Prokurorisë (KLP), ku janë paraqitur indicie dhe të dhëna konkrete që, sipas saj, tregojnë se lëvizshmëria e ish-kreut të SPAK paraqet rrezikshmëri pas përfundimit të mandatit.

“Edhe pse komisioni pranë KLP i ka shqyrtuar këto indicie, deri tani Garda nuk ka marrë asnjë masë për të shtuar sigurinë ndaj tij”, deklaroi gazetarja.

Deklaratat e Jushit ngrenë pikëpyetje mbi nivelin e mbrojtjes që u ofrohet ish-zyrtarëve të drejtësisë, veçanërisht atyre që kanë drejtuar institucione kyçe në luftën kundër korrupsionit dhe krimit të organizuar.