Lucca, Itali – Janë zbardhur detaje të reja për tragjedinë që goditi një familje shqiptare në qytetin italian të Luccas, ku katër anëtarë humbën jetën si pasojë e një rrjedhjeje të gazit.

Viktimat janë identifikuar si Arti Kola, 48 vjeç, bashkëshortja e tij Jonida, 42 vjeçe, dhe dy fëmijët e tyre, Hajdar, 23 vjeç, dhe Xhesika, 15 vjeçe. Një person i pestë, vëllai i kryefamiljarit, u lëndua dhe po merr trajtim në spital.

Tragjedia ndodhi mbrëmjen e së mërkurës, më 4 shkurt 2026, ndërsa hetuesit dyshojnë se shkak ka qenë një defekt në kaldajën e banesës trekatëshe ku jetonte familja.

Autoritetet raportojnë se, gjatë hyrjes në banesë, ekipet e shpëtimit gjetën tryezën e shtruar, duke treguar se familja ishte përgatitur për të ngrënë. Alarmin e dha vëllai i kryefamiljarit, i cili njoftoi karabinierët. Pas trokitjeve të shumta pa përgjigje, forcat e rendit u detyruan të thyejnë derën dhe u përballën me katër trupat e pajetë të familjarëve.

Autoritetet vijojnë hetimet për të sqaruar rrethanat e sakta të ngjarjes, ndërsa mjekët dhe ekspertët teknikë po kontrollojnë instalacionin e gazit për të përcaktuar shkakun përfundimtar të tragjedisë.

“Është një humbje e madhe dhe e papritur, një ngjarje që ka tronditur komunitetin shqiptar në Itali,” tha një zëdhënës i autoriteteve lokale.

Kjo ngjarje rikujton nevojën për siguri maksimale në përdorimin e pajisjeve të gazit dhe kontrollin e rregullt të instalimeve në banesa.