Ish-deputeti i Partisë Demokratike, Edmond Spaho, ka reaguar me tone ironike ndaj deklaratave të Sekretarit të Përgjithshëm të PD-së, Flamur Noka, pas emërimit të Dashnor Sulës në detyrën e Kryeinspektorit të Përgjithshëm.

Përmes një postimi në rrjetet sociale, Spaho ka cituar fillimisht reagimin e Nokës lidhur me këtë emërim, për ta shoqëruar më pas me një koment thumbues ndaj drejtimit aktual të partisë dhe zgjedhjeve politike të Sali Berishës.

“Sekretari i Përgjithshëm i PD-së, Flamur Noka, ka reaguar pas emërimit të ish-deputetit të PD-së Dash Sula, si kryeinspektor i përgjithshëm. ‘Berisha mund të gabojë kur afron, por jo kur largon. Të gjithë ata që kishin dyshime dhe na sulmuan për gjysmagjelin, e morën përgjigjen sot me zë dhe figurë’, shkruan Mul Noka”, citon Spaho deklaratën.

Më pas, ish-deputeti demokrat shton me ironi:
“Ka të drejtë Flamuri, ata që doktori mban afër janë zgjedhje të gabuara të tij”.

Reagimi i Spahos shihet si një tjetër shenjë e përçarjeve dhe tensioneve të vazhdueshme brenda Partisë Demokratike, veçanërisht pas emërimeve dhe lëvizjeve të fundit që kanë ngjallur debate të forta në radhët e saj.