Dritan Zaimi është mësuesi i gjuhës angleze që u shkarkua nga detyra pasi akuzohet se predikonte fenë gjatë orëve të mësimit me nxënës të arsimit bazë në shkollën “Gustav Mayer” në Tiranë. Sipas informacioneve, ai nuk ka aktualisht telefon apo forma komunikimi të drejtpërdrejta, por profilet e tij online, të hapura prej vitesh, hedhin dritë mbi formimin dhe aktivitetin e tij personal.

Zaimi ka lindur më 5 maj 1975 në Gramsh. Shkollën e mesme të gjuhëve të huaja e ka përfunduar në Tiranë në vitin 1993, ndërsa në vitin 1997 është diplomuar si mësues i gjuhës angleze në Universitetin e Tiranës. Paralelisht me profesionin e mësimdhënies, ai është marrë edhe me letërsi, duke u prezantuar në platforma virtuale si autor me interes të hershëm për poezinë.

Në vitin 2001 botoi librin e tij të parë poetik me titull “Dhimbja”. Krijimtaria e tij letrare karakterizohet nga tema filozofike dhe shpirtërore, me reflektime mbi jetën, vdekjen dhe raportin e njeriut me të shenjtën. Poezitë e publikuara online sugjerojnë një botëkuptim të thellë introspektiv dhe simbolik.

Sipas denoncimeve, gjatë orëve të mësimit Zaimi u shfaqte nxënësve video me përmbajtje fetare dhe u jepte detyra që lidhen me urdhërimet e fesë, që dyshohet se kishte lidhje me besimin e Dëshmitarëve të Jehovait. Këto veprime u konsideruan shkelje e rëndë e rregullave të arsimit laik, duke çuar në shkarkimin e tij nga detyra.

Një nga vargjet e tij më të komentuara online shprehet: “Atë që s’e kuptojmë e quajmë budalla. Atë që s’na kupton përsëri e quajmë budalla”, vargje që sot po rikthehen në vëmendje mes debatit publik për rastin.