Gjatë një fjalimi të mbajtur në Kamëz me strukturat e Partisë Demokratike, kreu i PD-së Sali Berisha ka ngritur akuza të forta ndaj Daniel Shimës, ish-zv/drejtor i AKSHI-t, emri i të cilit u përfol gjerësisht gjatë muajit gusht të vitit të kaluar për një rrëmbim të dyshuar.

Berisha deklaroi se fillimisht kishte mbrojtur Shimën, por sipas tij, faktet e mëvonshme tregojnë se ish-zyrtari ka përfituar fonde publike nga AKSHI, të cilat janë regjistruar në emër të nënës së tij. Sipas Berishës, nëna e Shimës, e cila ushtronte profesionin e rrobaqepëses, rezulton sot e regjistruar si sipërmarrëse me miliona lekë në emër të saj.

Kreu i PD-së akuzoi se Shima dhe familjarët e tij kanë përfituar shuma të konsiderueshme parash nga fondet e AKSHI-t, duke e cilësuar rastin si një tjetër shembull të korrupsionit dhe keqpërdorimit të parave publike.

Deklaratat e Berishës vijnë në vijim të akuzave të përsëritura të opozitës ndaj qeverisë dhe institucioneve të lidhura me menaxhimin e fondeve shtetërore, ndërsa deri më tani nuk ka pasur një reagim zyrtar nga Daniel Shima apo nga AKSHI lidhur me këto pretendime.