Administrata Tatimore ka hapur aplikimet për përfitimin e kompensimit të tatimit të mbipaguar, që rrjedh nga zbritja e shpenzimeve për arsimin e fëmijëve. Përfitojnë individët që kanë plotësuar Deklaratën Individuale të të Ardhurave (DIVA 2025) dhe kanë rezultuar me tatim të mbipaguar pas zbritjes së shpenzimeve prej 48 mijë lekë në vit ose deri në 100 mijë lekë në vit (kur të ardhurat vjetore janë deri në 1.2 milionë lekë).
Si bëhet aplikimi
Aplikimi kryhet online përmes sistemit e-Tax / e-Filing. Pas hyrjes në llogari:
• Zgjidhet moduli eFiling IM → Çështjet e mia
• Krijohet një çështje e re te Pyetje të Përgjithshme
• Plotësohet kërkesa për rimbursim (sipas shumës që shfaqet në DIVA)
• Bashkëngjiten dokumentet në format PDF
Dokumentet e nevojshme
• Dokument me të dhënat e llogarisë bankare (IBAN)
• Certifikata familjare
• Dokumentacion që vërteton shpenzimet e arsimit (kontrata me institucionet arsimore dhe faturat e pagesave, përfshirë kurse gjuhësh të huaja, etj.)
Pas dorëzimit të kërkesës, kompensimi transferohet në llogarinë bankare të deklaruar. Administrata Tatimore ka njoftuar se procedura do të shoqërohet edhe me një video udhëzuese.
Sa është kompensimi
Shuma ndryshon sipas të ardhurave dhe numrit të fëmijëve në ngarkim:
• Të ardhura mbi 1.2 mln lekë/vit, 1 fëmijë: rreth 62 euro/vit
• Të ardhura mbi 2 mln lekë/vit, 2 fëmijë: rreth 12 mijë lekë
• Pagë mbi 200 mijë lekë/muaj (tatim 23%): 11,040 lekë për fëmijë
• Shuma maksimale (të ardhura nën 1.2 mln lekë/vit, me zbritje 100 mijë lekë): deri në 250 euro
Afatet
• Sistemi DIVA është hapur më 22 janar
• Afati për plotësimin e DIVA: 31 mars
• Afati për aplikimin e kompensimit: deri 3 muaj pas plotësimit të DIVA
Vlera e kompensimit llogaritet automatikisht nga sistemi e-Tax pas deklarimit të të ardhurave.
