Një investigim i Top Channel ka hedhur dritë mbi dyshime serioze për indoktrinim fetar të fëmijëve në arsimin fillor në shkollën private “Gustav Mayer” në Tiranë. Sipas materialit investigativ të gazetares Kristi Gongo, mësuesi i anglishtes Dritan Zaimi dyshohet se u ka predikuar fenë nxënësve gjatë procesit mësimor.

Nga verifikimet rezulton se Zaimi është ndjekës i Alketa Auer, një pastore e vetëshpallur e të ashtuquajturës Kisha Online Ndërkombëtare, një grupim fetar që vepron në internet dhe nuk njihet ligjërisht nga shteti shqiptar. Burime mediatike bëjnë me dije se kontaktet mes tyre janë forcuar që prej vitit 2020, periudhë kur dyshohet se ka nisur edhe aktiviteti fetar i mësuesit.

Materialet e siguruara tregojnë se fëmijëve u janë dhënë detyra shtëpie me përmbajtje fetare, të cilat janë vlerësuar me notë, ndërsa disa prindër kanë deklaruar se mësuesi u ka predikuar nxënësve besime fetare brenda ambienteve të shkollës.

Postimet e Zaimit në rrjetet sociale tregojnë për përkatësi në një rrymë që ndërthur elementë të krishterimit dhe judaizmit, ku Jezusi përmendet si Yahushua. Në publikimet e tij përdoret një gjuhë e fortë, me thirrje për ndëshkim dhe mesazhe alarmuese ndaj atyre që nuk besojnë.

Përveç aktivitetit online, grupimi fetar raportohet se zhvillon takime edhe në një ambient fizik në zonën e Astirit, ku organizohen evente fetare, përfshirë edhe pagëzime, mes tyre edhe të fëmijëve.

Rasti ka ngritur shqetësime mbi respektimin e ligjit për arsimin laik, mbrojtjen e të miturve dhe nevojën për ndërhyrje institucionale për verifikimin e këtyre pretendimeve.