Kryetari i Bashkisë së Rrogozhinës, Edison Memolla, është vetëdorëzuar në polici, pasi Gjykata e Apelit e Posaçëm e shpalli fajtor për akuzën e korrupsionit aktiv në zgjedhje, kryer në bashkëpunim. Apeli la në fuqi dënimin me 1 vit burgim, si dhe vendosi një dënim plotësues, duke i hequr Memollës të drejtën për të ushtruar funksione publike për një periudhë 5-vjeçare.

Sipas Prokurorisë së Posaçme (SPAK), Memolla akuzohet se ka ndikuar te elektricisti Blerim Xhamani për të mos i ndërprerë energjinë elektrike një abonenteje debitore, me qëllim që kjo e fundit të votonte në favor të tij në zgjedhjet e pjesshme lokale të 6 marsit 2022. Në atë kohë, Memolla kandidonte nën siglën e Partisë Socialiste.

Hetimet e SPAK zbuluan se veprimi ishte pjesë e një skeme për të ndikuar drejtpërdrejt në vullnetin e votuesve, duke përdorur favore konkrete në këmbim të votës. Vendimi i Apelit e bën përfundimtar dënimin penal, duke çuar në ekzekutimin e menjëhershëm të masës së burgimit dhe largimin e Memollës nga funksionet publike.

Rasti konsiderohet një tjetër precedent i rëndësishëm në ndëshkimin e korrupsionit zgjedhor dhe në përpjekjet për të garantuar integritetin e proceseve elektorale në vend.