Një ngjarje e rëndë ka tronditur Kalithean të Greqisë ditën e djeshme, ku një vajzë shqiptare 2-vjeçare ra aksidentalisht në shatërvanin e sheshit “Kyprou” dhe aktualisht ndodhet në gjendje kritike për jetën.
Autoritetet greke kanë njoftuar se menjëherë pas incidentit, policia ka nxjerrë fëmijën nga shatërvani dhe i ka dhënë ndihmën e parë, ndërsa më pas ajo është transportuar në spital për trajtim të specializuar mjekësor.
Sipas mediave lokale, vogëlushja ndodhej në shesh së bashku me babain e saj 26-vjeçar, ndërsa nëna e saj është 23 vjeç. Në një moment, fëmija i ka shpëtuar vëmendjes së prindërve dhe ka rënë në shatërvan në rrethana ende të paqarta.
Të dy prindërit janë arrestuar nga policia greke për neglizhencë ndaj të miturës dhe pritet të dërgohen në prokurori për sqarimin e plotë të rrethanave që çuan në këtë aksident tragjik.
