Një ngjarje e rëndë ka tronditur ditën e sotme fshatin Vashtëmi të bashkisë Maliq, ku një 61-vjeçar është gjetur pa shenja jete në banesën e tij.

Sipas informacioneve paraprake, viktima, Ismail Ismaili, dyshohet se ka qenë në një gjendje të rënduar emocionale pas ndarjes nga jeta të bashkëshortes së tij, e cila kishte ndërruar jetë rreth tre muaj më parë. Burime nga zona bëjnë me dije se humbja e saj e kishte prekur thellë dhe ai e kishte pasur të vështirë ta përballonte dhimbjen.

61-vjeçari jetonte me nënën e tij, e cila raportohet se e ka gjetur të pajetë, ndërsa fëmijët e tij jetojnë jashtë Shqipërisë. Banorë të fshatit tregojnë se pas vdekjes së bashkëshortes, ai ishte izoluar dhe e përjetonte rëndë mungesën e saj.

Policia ka shkuar në vendngjarje dhe ka nisur hetimet për të sqaruar plotësisht rrethanat, ndërsa materialet i janë referuar Prokurorisë. Ngjarja ka shkaktuar trishtim dhe tronditje në komunitetin lokal.