Reperi i njohur amerikan 50 Cent ka reaguar me ironi ndaj yllit të NFL-së Stefon Diggs, në një moment kur sportisti po përballet jo vetëm me humbjen në Super Bowl 2026, por edhe me thashetheme për një ndarje nga Cardi B.

Përmes një postimi në Instagram, 50 Cent shkroi:
“Mund ta imagjinoni të zgjohesh në mëngjes dhe të kesh humbur edhe këtë b!tch edhe Super Bowlin? Unë do t’u thosha të gjithëve të më linin rehat, do pija një gotë dhe do kthehesha të flija.”

Komentet e reperit erdhën pasi New England Patriots, skuadra e Diggs, u mposht nga Seattle Seahawks me rezultatin 29–13 në Super Bowl 2026. Paralelisht me humbjen sportive, në rrjet kanë qarkulluar zëra për një krizë në marrëdhënien e tij me Cardi B.

Reperja ishte e pranishme në Super Bowl, i zhvilluar në Levi’s Stadium në Santa Clara, Kaliforni, dhe mori pjesë në shfaqjen e pjesës së pushimit, të udhëhequr nga Bad Bunny. Megjithatë, ajo dhe Diggs nuk u panë bashkë gjatë eventit, çka shtoi spekulimet.

Dyshimet u përforcuan edhe më shumë pasi të dy hoqën njëri-tjetrin nga Instagrami, ndërsa Cardi B i dërgoi Diggs vetëm një mesazh të shkurtër përmes ESPN përpara ndeshjes: “Good luck.”

Sipas mediave amerikane, Cardi B kishte planifikuar një organizim luksoz për Super Bowlin, përfshirë një suitë prej 125 mijë dollarësh dhe një festë pas ndeshjes me vlerë rreth 1.2 milionë dollarë.

Romanca mes Cardi B dhe Stefon Diggs u bë publike në maj 2025. Në shtator të po atij viti, reperja njoftoi se ishte shtatzënë, ndërsa në nëntor solli në jetë fëmijën e tyre të parë. Cardi B ka gjithashtu tre fëmijë nga martesa e mëparshme me Offset, nga i cili u nda në vitin 2024.

Deri më tani, as Cardi B dhe as Stefon Diggs nuk kanë reaguar zyrtarisht për zërat e ndarjes.