Kryeministri Edi Rama, në podcastin “Flasim”, ka reaguar ashpër ndaj kërkesës së Prokurorisë së Hagës për dënimin me 45 vite burg të ish-krerëve të UÇK-së: Hashim Thaçi, Kadri Veseli, Jakup Krasniqi dhe Rexhep Selimi.
Rama e cilësoi kërkesën si një akt të papranueshëm, duke deklaruar: “Kërkesa për 45 vite burg për të katër figurat domethënëse të Luftës Çlirimtare ishte një bombë e hedhur mbi popullin dhe mbi Republikën e Kosovës.”
Ai shtoi se i duhet kohë për të përballur me fjalë atë që e quajti “një çmenduri, një paturpësi dhe një mizori”, ndërsa kritikoi ashpër Prokurorinë për mënyrën se si ka ndërtuar akuzat.
Sipas tij, pas rreth gjashtë vitesh hetime, pretendimet për krime kundër njerëzimit dhe krime lufte gjatë viteve 1998–1999 nuk janë shoqëruar me prova të qarta për ekzistencën e një plani të organizuar për sulme ndaj civilëve. “Nuk ka asnjë ligj ndërkombëtar që lejon dënime mbi pretendime të tilla pa provuar se ekziston një plan dhe një forcë e organizuar për të sulmuar civilët si të tillë”, u shpreh Rama.
Kryeministri theksoi gjithashtu se, sipas tij, drejtuesit e një lufte çlirimtare nuk mund të mbajnë përgjegjësi penale vetëm për shkak të rolit të tyre drejtues, në mungesë të provave për urdhra të drejtpërdrejtë apo kontroll efektiv mbi formacionet që kanë kryer shkelje.
Deklaratat e Ramës vijnë në një moment të ndjeshëm për opinionin publik në Kosovë dhe Shqipëri, ndërsa procesi gjyqësor ndaj ish-udhëheqësve të UÇK-së vijon në Hagë.
