Presidentja e Republikës së Kosovës, Vjosa Osmani, ka pranuar një letër urimi nga Presidenti i Shteteve të Bashkuara të Amerikës, Donald Trump, me rastin e 18-vjetorit të shpalljes së Pavarësisë së Kosovës.

Në mesazhin e tij, Presidenti Trump ka përgëzuar popullin e Kosovës për këtë përvjetor të rëndësishëm, duke rikonfirmuar mbështetjen e palëkundur të SHBA-ve për sovranitetin dhe integritetin territorial të Republikës së Kosovës.

Ai ka shprehur gjithashtu gatishmërinë për thellimin e partneritetit mes dy vendeve, veçanërisht në drejtim të rritjes së tregtisë dhe investimeve, me synim forcimin e prosperitetit të përbashkët. Në letër theksohet edhe angazhimi i Shteteve të Bashkuara për të bashkëpunuar me Kosovën në funksion të paqes dhe stabilitetit rajonal.

Presidenti Trump ka falënderuar Presidenten Osmani dhe qytetarët e Kosovës për mbështetjen ndaj përpjekjeve amerikane për paqe, duke mirëpritur gjithashtu rolin e Kosovës si anëtare themeluese e Bordit të Paqes, një iniciativë që synon forcimin e sigurisë dhe bashkëpunimit ndërkombëtar.

Në përmbyllje të mesazhit, Presidenti amerikan ka shprehur besimin se marrëdhëniet dhe partneriteti mes dy vendeve do të forcohen edhe më tej në vitet në vijim.