Rritja e konsumit të proteinave me origjinë bimore mund të ulë ndjeshëm rrezikun për vdekje të parakohshme dhe sëmundje kronike, sugjeron një analizë e gjerë e realizuar nga studiues amerikanë dhe iranianë.
Hulumtimi përfshiu 32 studime afatgjata me mbi 715 mijë persona të rritur, të ndjekur deri në 32 vjet. Sipas rezultateve, një rritje prej vetëm 3% në marrjen ditore të proteinave bimore lidhet me rreth 5% ulje të rrezikut për vdekje të hershme.
Ekspertët theksojnë se ndryshimi është i arritshëm në praktikë. Në një dietë me rreth 2.500 kalori në ditë, zëvendësimi i afërsisht 75 kalorive nga burime të tjera me arra ose bishtajore mund të sjellë përfitime të matshme për shëndetin.
Sëmundjet e zemrës dhe kanceri mbeten ndër shkaqet kryesore të vdekshmërisë në nivel global. Sipas autorëve të analizës, zëvendësimi gradual i një pjese të proteinave shtazore me alternativa bimore mund të ndikojë pozitivisht në uljen e rrezikut për këto patologji.
Nutricionistja Viki Retelny thekson se nuk ekziston një dietë e vetme ideale, por një regjim i balancuar që përfshin të gjithë makronutrientët është thelbësor për forcimin e sistemit mbrojtës të organizmit dhe ruajtjen e shëndetit në afatgjatë.
Proteinat shtazore gjenden kryesisht në mish, peshk, vezë dhe produkte qumështi, ndërsa burimet bimore përfshijnë bishtajoret, arrat, farat dhe produktet e sojës. Këto të fundit përmbajnë gjithashtu fibra dhe antioksidantë, elementë që lidhen me mbrojtjen ndaj sëmundjeve kronike.
Ekspertët rekomandojnë hapa të thjeshtë, si praktikimi i një dite pa mish në javë apo zëvendësimi gradual i disa vakteve me alternativa bimore. Sipas tyre, konsumimi i rregullt i 5–7 porcioneve proteinash bimore në javë mund të kontribuojë në uljen e rrezikut për sëmundje kardiovaskulare dhe në rritjen e jetëgjatësisë.
Në përfundim, evidencat shkencore sugjerojnë se përmirësimi i cilësisë së proteinave në dietë – më shumë nga bimët dhe më pak nga burimet shtazore – mund të jetë një ndër strategjitë më të thjeshta për një jetë më të gjatë dhe më të shëndetshme.
