Hagë – Ish-kryeparlamentari i Kosovës, Kadri Veseli, deklaroi se drejtësia mund të vonohet, por nuk mund të mohohet, gjatë fjalës së tij në procesin gjyqësor që po zhvillohet në Hagë për katër ish-krerët e UÇK-së.

Duke u mbrojtur para trupit gjykues, Veseli theksoi se të gjitha veprimet e tij kanë qenë ligjore dhe në përputhje me përgjegjësitë që ka ushtruar.

“Unë e di kush jam, çfarë kam bërë e çfarë nuk kam bërë. Veprimet e mia kanë qenë ligjore. Gjykata duhet me çdo kusht të mbrojë të vërtetën, drejtësinë dhe paanësinë. Edhe në momentet më të errëta nuk e humba besimin se e vërteta do të triumfojë. Liria nuk mund të arrihet prej padrejtësisë”, u shpreh ai.

Veseli foli edhe për përvojën personale dhe familjare gjatë viteve të fundit, duke e cilësuar atë si një periudhë të vështirë.

“Familja ime dhe unë kemi jetuar në persekutim të vazhdueshëm. Unë e di çka do të thotë të jetosh në kërcënim të vazhhdueshëm, kjo është një përvojë që nuk do t’ia dëshiroj askujt. Pas dekadash hetime dhe dokumentesh, nuk ka asnjë provë se kam kryer krime”, tha Veseli.

Procesi ndaj ish-drejtuesve të UÇK-së vijon në Hagë, ndërsa mbrojtja dhe prokuroria paraqesin argumentet e tyre përpara vendimit përfundimtar të trupit gjykues.