Tiranë – Struktura e Posaçme kundër Korrupsionit dhe Krimit të Organizuar (SPAK) ka kërkuar nga 10 vite burg për ish-zv.ministrin e Shëndetësisë Klodian Rrjepaj dhe biznesmenin Ilir Rrapaj.

Në rast se shpallen fajtorë dhe përfitojnë nga gjykimi i shkurtuar, dënimi i tyre konvertohet në 6 vite e 8 muaj burg.

Prokuroria e Posaçme kërkoi gjithashtu 3 vite e 6 muaj burg për tre ish-zyrtarë të tjerë: Marsela Serjanaj, Sajmir Kadiu dhe Petref Mersini. Për Serjanajn dhe Kadiun, në rast të aplikimit të gjykimit të shkurtuar, dënimi pritet të konvertohet në 2 vite e 4 muaj burg, ndërsa për Mersinin u kërkua 4 vite shërbim prove.

Për mjekun Arben Gjata, SPAK kërkoi që dënimi me 1 vit e 4 muaj burg të konvertohet në 3 vite shërbim prove. Ndërsa për Genc Byrazeri dhe Naile Ajazi u kërkua nga 2 vite shërbim prove.

Ish-ministri i Shëndetësisë, Ilir Beqaj, po gjykohet i veçuar nga tetë të pandehurit e tjerë, pasi nuk ka kërkuar gjykim me procedurë të shkurtuar.

Mbrojtja e të pandehurve përfundoi sot, ndërsa vendimi pritet të shpallet më 4 mars nga Gjykata e Posaçme kundër Korrupsionit dhe Krimit të Organizuar.