TIRANË – Muhamet Hoxha, ministër i Mjedisit Jetësor dhe Planifikimit Hapësinor i Maqedonisë së Veriut, vlerësoi sot Korridorin VIII si një projekt strategjik që lidh Adriatikun me Detin e Zi, duke fuqizuar integrimin rajonal, zhvillimin ekonomik dhe sigurinë.

Gjatë punimeve në Forumit Ekonomik të Korridorit VIII, Hoxha e përshkroi korridorin si “një arterie që bashkon ekonomitë, njerëzit dhe perspektivat e vendeve tona të rajonit”, duke theksuar se ai nuk është thjesht rrugë apo linjë hekurudhore, por një simbol i integrimit dhe bashkëpunimit rajonal.

“Zhvillimi i Korridorit VIII hap horizonte të reja për ekonominë e vendeve tona, sjell përmirësim të infrastrukturës, ulje të kostove të transportit, rritje të efikasitetit dhe konkurrencës,” tha Hoxha.

Ministri nënvizoi gjithashtu se korridori do të shtojë investimet, modernizimin e logjistikës dhe krijimin e vendeve të reja të punës, duke bërë të mundur qarkullimin e lirë të mallrave, shërbimeve dhe ideve midis vendeve të rajonit.

“Korridori VIII afron qytetet tona duke shkurtuar kohën, duke i bërë ato më të afërta për biznes, turizëm dhe bashkëpunim kulturor. Lëvizshmëria nuk është vetëm fizike, ajo është edhe politike, ekonomike dhe shoqërore,” theksoi Hoxha.

Ai shtoi se zhvillimi i korridorit duhet të shkojë dorë për dorë me ruajtjen e mjedisit:

“Çdo projekt infrastrukturor duhet të respektojë standardet më të larta të mbrojtjes së natyrës. Investimi në hekurudha është një hap drejt transportit më të pastër, reduktimit të emetimeve dhe planifikimit që minimizon ndikimin në biodiversitet dhe zonat e mbrojtura.”

Hoxha përfundoi duke e cilësuar Korridorin VIII si një hap konkret drejt integrimit evropian dhe drejt një rajoni më të qëndrueshëm, bashkëpunues dhe ekologjikisht të përgjegjshëm.