Janë publikuar pamje nga momenti kur Gazmend Buçpapa largohet së bashku me bashkëshorten e tij nga zona e ish-Parkut në kryeqytet, pas ngjarjes së rëndë ku mbeti i vrarë 31-vjeçari Egli Pashollari.

Fotoja, është fiksuar nga kamerat e sigurisë në zonë dhe tregon 40-vjeçarin teksa ecën i qetë në krah të bashkëshortes.

Sipas burimeve pranë grupit hetimor, autori i dyshuar kishte mbërritur rreth orës 15:30 për të marrë bashkëshorten e tij, e cila punonte në një market pranë vendit të ngjarjes. Pasi ajo ka hipur në automjet, ai ka vënë re në distancë të riun, i cili shoqërohej nga një mik i tij.

Burime nga hetimi bëjnë me dije se viktima nuk ishte i panjohur për 40-vjeçarin, pasi bashkëshortja e tij kishte shprehur më herët shqetësime për ngacmime të pretenduara. Në këto rrethana, ai ka zbritur nga makina dhe është përballur me 31-vjeçarin, duke e goditur me mjet prerës disa herë. I riu ndërroi jetë më pas në spital si pasojë e plagëve të marra.

Pas ngjarjes, autori ka lëvizur me automjetin e tij tip “Audi”, të cilin e ka braktisur pak metra larg, ndërsa më pas është larguar me taksi së bashku me bashkëshorten. Policia ka sekuestruar mjetin dhe ka marrë në pyetje bashkëshorten e tij, ndërsa vijojnë kërkimet për kapjen e 40-vjeçarit.

Grupi hetimor, nën drejtimin e Prokurorisë, po punon për dokumentimin e plotë të rrethanave të kësaj ngjarjeje të rëndë.