Ka arritur në 74 numri i personave që kanë humbur jetën pas operacionit të forcave meksikane që çoi në vdekjen e bosit të kartelit “El Mencho” dhe valës së dhunës që pasoi në disa zona të vendit.

Sipas të dhënave zyrtare, mes viktimave janë 25 anëtarë të Gardës Kombëtare, 17 oficerë të tjerë të zbatimit të ligjit, një agjent i zyrës së prokurorit dhe një roje burgu. Në mesin e viktimave civile përfshihet edhe një grua në muajin e tretë të shtatzënisë.

Autoritetet bëjnë të ditur se gjatë operacioneve të sigurisë janë arrestuar mbi 30 persona. Prej tyre, 12 janë ndaluar për përfshirje në incidente të dhunshme, ndërsa më shumë se 20 të tjerë për plaçkitje të bizneseve dhe institucioneve financiare.

Dhuna shpërtheu pas ndërhyrjes së forcave të sigurisë kundër liderit të kartelit, duke shkaktuar përplasje të armatosura, barrikada dhe akte vandalizmi në disa rajone të Meksikës. Autoritetet vijojnë operacionet për rikthimin e rendit dhe garantimin e sigurisë publike.