Kryeministri i Kosovës, Albin Kurti, ka folur para mediave pas takimit me kreun e LDK-së, Lumir Abdixhiku, duke theksuar nevojën për një marrëveshje më të gjerë politike për zgjedhjen e Presidentit.

Kurti konfirmoi se aktualisht Vetëvendosje me partnerët mund të sigurojë vetëm 66 vota, ndërsa për zgjedhjen e Presidentit në dy raundet e para nevojiten 80 vota. Ai shtoi se as partitë opozitare nuk i kanë numrat e mjaftueshëm për të propozuar e votuar një kandidat të vetëm.

“U zotuam për komunikim dhe kontakte të drejtpërdrejta, që të hapim një kapitull të ri ndërmjet partive politike. Tash na duhen dy të tretat për zgjedhjen e Presidentit. Ne si Vetëvendosje nuk kemi garuar me një kandidat për President gjatë zgjedhjeve. Duhet ta gjejmë një zgjidhje, e cila është ndërmjet këto tri forcave politike”, tha Kurti.

Ai theksoi se nuk ka një favorizim ndaj asnjë force të caktuar, duke shtuar se i mungojnë të paktën 14 vota për të arritur shumicën e nevojshme. “Nëse ka marrëveshje me LDK-në, shkojmë te numri 81, ku nuk duhet të mungojë asnjë deputet në sallë”, u shpreh ai.

Kurti bëri të ditur gjithashtu se një natë më parë kishte qëndruar në Prekaz, ku ishte takuar me familjen Jashari, por nënvizoi se për çështjen e Presidentit nevojitet konsensus i gjerë politik për të kaluar pragun kushtetues.