Deputeti i Partisë Demokratike, Eno Bozdo, ka ngritur shqetësimin në seancën plenare të së hënës për gjendjen rrugore në disa njësi administrative të bashkisë së Kuçovës, duke theksuar se banorët po penalizohen për të marrë shërbimet bazë.

Bozdo përmendi konkretisht segmentin Goraj-Velagoshtë, i cili mbetet i papërfunduar që prej vitit 2012, pavarësisht premtimeve të përsëritura të qeverisë socialiste.

“Është shqetësim i ngritur shpesh nga qytetarët që kërkojnë nivelin më minimal të shërbimeve në nivel lokal, që do të thotë që rrugët kryesore që lidhin qendrën e bashkisë me njësitë administrative duhet të kenë infrastrukturë minimale. Aktualisht, gjendja është e tillë që është e pamundur kalimi i makinave, veçanërisht atyre të larta”, tha Bozdo, duke kërkuar ndërhyrje të menjëhershme nga autoritetet.