Deputeti i Partisë Socialiste, Erion Braçe, ka ngritur shqetësimin lidhur me kohëzgjatjen e ndërtimit të shkollës “11 Janari” dhe zhvillimin e mësimit me turne. Gjatë një interpelance me Ministren e Arsimit, Mirela Kumbaro, Braçe deklaroi:

“Një muaj, 2 ditë dhe 2 orë për t’u kthyer në normalitet. Për çfarë, për 10 minuta. Pyetjet që kam paraqitur lidhen me shqetësimin qytetar. Kam prioritet ndërtimin e shkollës 11 Janari, ndërtimi i shkollës është e mirë publike, por shoqërohet edhe me shqetësime për fëmijët dhe prindërit e gjyshërit. Administrimi i kohës së ndërtimit të një shkolle mund të bëhet thjeshtë. Fëmijët kryejnë shkollën pasdite dhe ndryshojnë agjendën e dhe të prindërve që janë në punë.”

Nga ana e saj, ministrja Kumbaro sqaroi se ndërtimi i shkollës “Edith Durham” ka përfunduar dhe aktualisht po bëhet mobilimi i saj me orendi dhe mjete didaktike, duke përgatitur ambientet për kthimin e nxënësve:

“Sot kemi një ndërtesë moderne me standarde bashkëkohore infrastrukturore, me kapacitete të zgjeruara për nxënësit, me klasa funksionale dhe hapësira të dedikuara për zhvillimin e lëndëve mësimore. Shkolla e re ‘Edith Durham’ ka 33 klasa mësimore, 10 laboratorë të specializuar, sallë multimediale, bibliotekë dhe palestër me sipërfaqe prej 405 m². Nxënësit po zhvillojnë mësimin në ambientet e shkollës ‘Emin Duraku’, vetëm 160 metra larg, duke mos u shkëputur nga zona e zakonshme,” tha ministrja.

Kumbaro theksoi gjithashtu se investimet në objektet arsimore mbeten prioritet kryesor dhe se vetëm në Tiranë janë ndërtuar dhe rikonstruktuar mbi 70 shkolla të reja me laboratorë, biblioteka, palestra dhe terrene sportive, duke garantuar kushte moderne për mijëra nxënës.