Një 45-vjeçar është plagosur me armë zjarri në këmbë pas një konflikti për motive të dobëta në Shkodër, ndërsa autori është arrestuar nga policia vetëm pak minuta pas ngjarjes.

Sipas policisë, ngjarja ka ndodhur në vendin e quajtur Ura e Dervishbeg, ku një shtetas ka qëlluar me armë zjarri një person tjetër gjatë një konflikti.

Specialistët për Hetimin e Krimeve të Komisariatit të Policisë Shkodër, në bashkëpunim me specialistët e Krimeve të Rënda dhe të mbështetur nga Forca e Posaçme “Shqiponja”, organizuan menjëherë punën për identifikimin dhe kapjen e autorit.

Falë reagimit të shpejtë të policisë, u bë i mundur identifikimi dhe arrestimi i autorit të dyshuar, shtetasit I. G., 39 vjeç, pronar i një servisi, i cili dyshohet se është konfliktuar për motive të dobëta me shtetasin G. H., 45 vjeç.

Gjatë ndërhyrjes, shërbimet e policisë sekuestruan edhe armën e zjarrit tip pistoletë, e cila rezulton të ishte me leje.

Policia bëri të ditur se vijon puna për dokumentimin e plotë ligjor të rastit, ndërsa materialet procedurale i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Shkodër për veprime të mëtejshme.