Autoritetet italiane kanë arrestuar një 48-vjeçar shqiptar në Calcinato, i dyshuar për trafik të lëndëve narkotike. Operacioni u krye nga Carabinieri, pas një periudhe vëzhgimi ndaj tij.

Sipas mediave italiane, i dyshuari ishte i njohur për policinë për shkak të precedentëve penalë të lidhur me narkotikët. Hetuesit dyshojnë se ai merrej me aktivitetin ilegal pasi përfundonte punën e tij të përditshme.

Gjatë kontrollit në banesën e tij, policia gjeti dhe sekuestroi rreth 100 gramë kokainë, 5 gramë hashash, si dhe municione të ndryshme: 10 fishekë kalibri .22 dhe 26 fishekë kalibri 9 mm.

Pas arrestimit, 48-vjeçari u paraqit para gjykatës, e cila vendosi ndaj tij masën e sigurisë “arrest shtëpiak”. Sipas vendimit, ai do të lejohet të dalë nga banesa vetëm për të shkuar në punë.

Ndërkohë, seanca e radhës gjyqësore është caktuar për 8 prill, ku pritet të shqyrtohet më tej çështja ndaj tij.