Komisionerja për Zgjerimin në Komisionin Evropian, Marta Kos, ka dhënë një mesazh të qartë për vendet që synojnë anëtarësimin në Bashkimin Evropian, duke theksuar se procesi i integrimit do të mbetet i bazuar rreptësisht në reforma dhe standarde demokratike.

Gjatë një seance në Parlamentin Evropian, Kos deklaroi se vendet që synojnë të bëhen pjesë e BE-së duhet të jenë demokraci të forta dhe të qëndrueshme, të afta të përballojnë ndikimet e jashtme, veçanërisht ato që vijnë nga Rusia.

“Vendet që do të na minonin nga brenda nuk mund të bëhen shtete anëtare të BE-së. Ne duhet të sigurohemi absolutisht për këtë. Vendet që i bashkohen BE-së duhet të jenë demokraci të forta dhe elastike, të afta t’i rezistojnë ndikimit toksik të Rusisë dhe të të tjerëve,” u shpreh Kos.

Komisionerja theksoi se në procesin e zgjerimit nuk mund të ketë rrugë të shkurtra për reformat, duke shtuar se qytetarët evropianë presin nga institucionet e BE-së një proces serioz dhe të besueshëm.

Në fjalën e saj, ajo iu referua edhe vendeve që aktualisht konsiderohen në pararojë të integrimit, si Shqipëria, Mali i Zi, Ukraina dhe Republika e Moldavisë. Sipas saj, fakti që këto vende janë vlerësuar deri tani me performancë më të mirë nuk u garanton një status të privilegjuar në proces.

“Duke qenë se jeni konsideruar deri tani si një shtet favorit në procesin e pranimit në BE, kjo nuk ju garanton një status të veçantë. Progresi duhet të ruhet në vijimësi përmes zbatimit të reformave,” theksoi ajo.

Deklarata e Kos nënvizon se edhe për vendet që konsiderohen në krye të procesit të zgjerimit nuk ka garanci për afate të caktuara për anëtarësim, nëse reformat ndalen ose devijojnë nga standardet e kërkuara nga Bashkimi Evropian.