Komanda e përbashkët ushtarake e Iranit ka paralajmëruar se bankat dhe institucionet financiare në Lindjen e Mesme mund të jenë objektiva të sulmeve të ardhshme.

Sipas mediave ndërkombëtare, autoritetet iraniane u kanë bërë thirrje banorëve të qëndrojnë larg bankave dhe institucioneve financiare brenda një rrezeje prej një kilometri, për shkak të rrezikut të mundshëm.

Deklarata vjen në një moment tensionesh të larta në rajon. Më herët, presidenti iranian Masoud Pezeshkian theksoi se Teherani kishte synuar vetëm bazat nga të cilat Izraeli dhe Shtetet e Bashkuara kishin nisur sulme ndaj territorit iranian.

Ndërkohë, një zëdhënës iranian paralajmëroi për një përshkallëzim të mëtejshëm, duke deklaruar se veprimet e kundërshtarëve kanë hapur rrugën për sulme ndaj objektivave financiare.

“Me këtë praktikë të paligjshme dhe jokonvencionale, armiku na ka dhënë dritën jeshile për të synuar qendrat financiare dhe bankat që i përkasin SHBA-së dhe regjimit sionist në rajon. Amerikanët duhet të presin hakmarrje të dhimbshme nga ne”, tha ai.