Policia e Vlorës ka arrestuar në flagrancë një 23-vjeçar nga Kosova, i cili u kap në momentin që po tentonte të vidhte një automjet tip furgon në qytet.

Sipas njoftimit zyrtar, specialistët e Seksionit për Hetimin e Krimeve në Komisariatin e Policisë Vlorë ndërhynë në kohë duke bërë të mundur kapjen e shtetasit G. P., 23 vjeç, banues në Pejë. Ngjarja ndodhi në orët e para të mëngjesit të datës 10 mars 2026, në lagjen “24 Maji”.

Gjatë kontrollit personal, policia i gjeti dhe sekuestroi një armë të ftohtë (thikë), e cila u mor në cilësinë e provës materiale.

Nga veprimet hetimore paraprake rezulton se i njëjti shtetas dyshohet të jetë autor edhe i një tjetër vjedhjeje të ndodhur më 6 mars 2026, ku është marrë një shumë parash në një lokal në lagjen “10 Korriku” në Vlorë.

Policia vijon hetimet për dokumentimin e plotë të kësaj ngjarjeje dhe për të verifikuar nëse 23-vjeçari është i përfshirë edhe në raste të tjera vjedhjeje. Ndërkohë, materialet procedurale i janë referuar Prokurorisë së Vlorës për veprat penale “Vjedhja” dhe “Mbajtja pa leje e armëve të ftohta”.