Sipas të dhënave të përpunuara nga Monitor, duke krahasuar çmimin aktual të naftës me të ardhurat mesatare për frymë, Shqipëria rezulton vendi më i shtrenjtë në Europë për karburantin.

Në vitin 2026, të ardhurat mesatare për frymë në Shqipëri janë rreth 12,000 dollarë në vit, ose 33 dollarë në ditë. Një litër naftë shitet me 200 lekë (2.4 dollarë), që përfaqëson 7.2% të të ardhurave ditore të një qytetari shqiptar – pesha më e lartë në Europë.

Në krahasim, në Serbi një litër karburant përfaqëson 3.7% të të ardhurave ditore, në Mal të Zi 3.6%, në Rumani 2.8%, dhe në Greqi 2.5%. Edhe pse çmimet nominale janë më të larta në disa vende si Holanda, diferenca e të ardhurave bën që pesha relative e karburantit të jetë shumë më e ulët jashtë Shqipërisë.

Arsye kryesore për çmimet e larta mbeten taksat, të cilat përbëjnë rreth 60% të çmimit të karburantit (akciza, taksa qarkullimi, taksa karboni dhe TVSH). Sipas ekspertëve, rritja e çmimeve ndodh shumë shpejt kur çmimi global rritet, ndërsa uljet reflektohen ngadalë në tregun vendas, duke rritur normat e fitimit të operatorëve.

Kjo situatë ka ndikim të drejtpërdrejtë mbi kostot e transportit dhe logjistikës në ekonomi, si dhe mbi shpenzimet e përditshme të familjeve shqiptare, duke e bërë Shqipërinë vendin ku karburanti konsumon pjesën më të madhe të të ardhurave mesatare në Europë.