Mbrëmja e djeshme në Big Brother VIP Albania u karakterizua nga zhvillime të forta në shtëpi, ku në qendër të vëmendjes ishte zgjedhja e Mirit si lider i ri.

Falë këtij roli, atij iu dha avantazhi për të dërguar banorë direkt në nominim. Miri vendosi të çojë në televotim Brikenën, Selin, Mateon dhe DJ Gimbo, duke krijuar një nga përballjet më të forta të javës.

Por ndërkohë që nominimi ka ndezur debat mes banorëve dhe publikut, një tjetër element ka tërhequr vëmendje në rrjetet sociale. Një postim në TikTok, i publikuar përpara nisjes së spektaklit, duket se kishte parashikuar saktësisht lëvizjen e liderit dhe emrat që do të shkonin në televotim.

Postimi, i cili po shpërndahet gjerësisht në rrjet, pretendon gjithashtu se pavarësisht këtij televotimi, këtë javë nuk pritet të ketë eliminim përfundimtar. Sipas teorisë që po qarkullon online, i eliminuari mund të jetë një nga emrat në nominim, por nëse ai është posedues i “biletës së fatit”, do të rikthehet menjëherë në lojë.

Kjo situatë ka nxitur reagime dhe dyshime në rrjet, ndërsa mbetet për t’u parë në spektaklin e radhës nëse parashikimi viral do të rezultojë i saktë apo thjesht një rastësi.