Pas ndarjes nga Fedez dhe një lidhjeje të shkurtër me Giovanni Tronchetti Provera, influencuesja dhe sipërmarrësja italiane Chiara Ferragni duket se ka gjetur sërish qetësi në jetën sentimentale.

Sipas raportimeve të revistës Chi, Ferragni është parë në Milano në shoqërinë e partnerit të ri, José Hernandez. Fotografitë e publikuara i tregojnë duke shëtitur në qytet me qenin e Ferragnit, Paloma, ndërsa pranë tyre ishte edhe nëna e saj, Marina Di Guardo, një detaj që sipas mediave italiane tregon seriozitetin e marrëdhënies.

Raportohet se Ferragni dhe Hernandez janë njohur gjatë pushimeve të Krishtlindjeve në Kolumbi, ku influencerja ndodhej me motrën e saj Valentina Ferragni dhe disa miq. Ajo që fillimisht dukej si një takim rastësor, u shndërrua pas disa javësh në një lidhje më të qëndrueshme, e cila tani po vazhdon në Milano.

José Hernandez, me origjinë kolumbiane dhe me bazë në Itali, është një menaxher i lartë në sektorin industrial. Ai ka punuar më parë për kompani të njohura si Pirelli dhe Prometeon Tyre Group, ndërsa aktualisht mban postin e Global Business Manager në Yokohama TWS, ku koordinon projekte ndërkombëtare për prodhuesit e gomave OEM.

Ndryshe nga Ferragni, Hernandez mban një profil të ulët në rrjetet sociale, me pak më shumë se dy mijë ndjekës në Instagram. Përveç karrierës në biznes, ai ka pasion udhëtimet dhe gatimin, madje ka bashkëpunuar herë pas here me restorante në Milano përmes projektit “Papi’s Kitchen”, të frymëzuar nga kuzhina kolumbiane.

Për Ferragnin, kjo marrëdhënie duket se shënon fillimin e një faze më të rezervuar në jetën personale, larg vëmendjes së tepruar mediatike që ka shoqëruar lidhjet e saj të mëparshme.