Egli Tako duket se vijon të jetë në qendër të vëmendjes së mediave rozë dhe rrjeteve sociale. Pas ndarjes së bujshme nga këngëtari Gjesti dhe mohimeve të vazhdueshme për romanca të reja, një tjetër thashethem po qarkullon së fundmi në rrjet.

Këtë herë, ndjekësit po dyshojnë se influencerja mund të ketë nisur një lidhje me ish-banorin e Big Brother VIP Albania, Redon Berani.

Dyshimet kanë lindur nga disa detaje që fansat pretendojnë se kanë zbuluar në fotografitë e publikuara nga të dy në rrjetet sociale. Në një prej fotove, Redoni shihet duke pozuar pranë një fuoristrade të zezë tip Mercedes-Benz G-Class. Ndërkohë, Egli ka publikuar gjithashtu imazhe pranë një makine të ngjashme të zezë, si dhe një tjetër foto ku shfaqet e ulur brenda një automjeti.

Këto detaje kanë mjaftuar që ndjekësit të ngrenë dyshime për një lidhje të mundshme mes tyre, megjithëse deri tani gjithçka mbetet në kuadrin e aludimeve.

Egli dhe Redoni krijuan një raport të afërt dhe miqësor në ditët e para të qëndrimit në shtëpinë e Big Brother VIP, por rrugëtimi i tyre u ndërpre pasi Redoni vendosi të largohej nga gara për shkak të presionit. Vetëm pas daljes së tij nga shtëpia, Egli nisi romancën me Gjestin.